Bylting mun eiga sér stað næstkomandi miðvikudag kl 14:00

Fólk spyr endalaust, bæði sjálft sig og aðra, hvernig anarkismi eigi eiginlega að ganga upp? Hvernig samfélag þar sem einstaklingsfrelsið er í hávegum haft og þarafleiðandi verði án yfirvalds af nokkru tagi; án refsilöggjafar, án skattstjóra, án ríkisstjórnar og þar sem lögregluembættinu hefur verið skipt út fyrir hjálparsveitir, eigi að ganga upp?

Spurningin er alltaf borin upp á röngum forsendum. Nefnilega þeim að anarkistar sé fólk sem sé að plana umbyltingu þess samfélagsskipulags sem við höfum öll alist upp við, sem er alveg rétt, en bylting anarkista er ekki eitthvað sem maður kemur á með vopnavaldi og þröngvar svo fólkinu í samfélaginu til að taka þátt í. Svoleiðis uppákoma heitir valdataka. Bylting með ofbeldi einhverra sem vilja koma á nýrri yfirstjórn er jafnvel enn verri valdníðsla en viðgengst þegar í umhverfi og lífi okkar allra og valdníðsla er eitthvað sem enginn anarkisti tekur þátt í.

Byltingu verður einungis viðkomið með þáttöku sem flestra í samfélaginu og bylting hefst alltaf innra með hverjum og einum einstakling sem finnur hjá sér hvöt til að spyrna á móti. Andspyrnan felst í því að kanna umhverfi sitt og daglegan hugsanagang sinn, sjá hvernig átroðningur einstaklingsfrelsisins fer fram allt í kringum okkur og hvernig hugur okkar meðtekur hann sem sjálfsagðan hlut. Síðan að vinna gegn þessum áhrifum í daglega lífinu. Láta vita af skoðun sinni. Ræða málin við vini og vinnufélaga, lesa meira um eðli kúgunar okkar, skrifa, vera vakandi og vekja annað fólk.

Þannig er bylting bráðsmitandi fyrirbæri og meinhollt um leið. Það þarf enginn að kalla sig anarkista eða hafa alla anarkismapælinguna á hreinu til að taka þátt. Það þarf heldur enginn að fá sér hring í nefið, furðulega klippingu eða tattó til að passa inn í einhvern anarkistaklúbb því svoleiðis klúbbur er alls ekki til. Anarkistar eru heldur ekki háðir neinum aldurstakmörkunum og skemmtilegast er að vita af ungu fólki ræða hlutverk anarkisma í þeirra framtíð við foreldra sína. Anarkismi er hugsjón um leið og anarkismi er praktísk aðferð við skipulagningu grundvallaratriða samfélags okkar þannig að við öll njótum góðs af. Líka þau sem eru að hagnast fjárhagslega á núverandi ástandi, þvílíkur léttir væri það ekki fyrir þau að þurfa ekki lengur að standa í hinni óhugnanlegu samkeppni lífgæðakapphlaupsins. Anarkismi er líka persónuleg leið til að átta sig á eigin lífi og getur verið leiðbeinandi á leið okkar allra til betra og mannvænna samfélags.

Það veit ekkert okkar hvernig eða hvenær félagsleg breytingar í átt að samfélagi án yfirstjórnar, byggt á grundvelli samvinnu og gagnkvæmrar virðingar munu eiga sér stað. Vonandi eru þær breytingar alltaf að eiga sér stað, einhversstaðar. Það veit heldur enginn hvernig þessháttar samfélag gæti litið út. Það sem við erum að gera er að byrja að láta vita af því að ástandið er ekki viðunandi og að við ætlum að gera eitthvað í því og erum að gera eitthvað í því m.a. með því að útbreiða þessa hugmyndafræði meðal almennings.

- Sigurður Harðarson